Majuskligo en Esperanto

Juna Afrika samideano, instruisto de Esperanto, skribis en komento inter alie: »germanoj ankaŭ havas similajn problemojn kiel kongolandanoj. En DR Kongon venas multaj eksterlandanoj: burundianoj, rundanoj, angolanoj, ugandanoj, zambianoj«. Mi opinias, ke la juna instruisto erare skribas etno-nomojn/ po­pol­nomojn minuskle.

Mi konscias, ke multaj samideanoj – inter ili ankaŭ konataj aŭtoroj – preferas minusklojn. Ankaŭ en la publikaĵoj de UEA kaj TEJO oni trovas tion. Sed UEA kaj TEJO skribas eĉ nomojn de monatoj minuskle, do klare kontraŭ Fundamento de Esperanto kaj sia propra statuto. Al mia kritiko pro tio la tiama prezidanto Mark Fettes respondis, ke tiel skribi estus nun ĝenerala kutimo. Ne nur pri tiu demando prezidinto Fettes estis evidente grandulfreneza.

Sekvante citaĵoj de D-ro André Albault (1923 – 2017), membro de Akademio de Esperanto (AdE) de 1962 – 1998, prezidanto de AdE de 1983 – 1995, el Fundamento de Esperanto (10a eldono, 1991), kaj de Gaston Waringhien (1901 – 1991), aŭtoro de »Plena vortaro de Esperanto« (1930), »Plena gramatiko de Esperanto« (1935), »Plena ilustrita vortaro de Esperanto« (1970), »Plena analiza gramatiko« (1980).


Antaŭvorto al la 10a eldono

Preparante tiun ĉi eldonon de la »Fundamento«, ni faris al la 9a eldono ok korektojn, specife al la etno-nomoj en paĝoj 142, 163, 165, 168, 205, 212, 226. Tiel »angl'(o)« fariĝas »Angl'(o), »franc'(o)« fariĝas »Franc'(o)« ktp.

Tiu korektado, nome la majuskligo de la etno-nomoj, estis farita konforme al la vort-listoj kuŝantaj sur paĝoj 50 (104), 70 (124) kaj 74 (128), kaj ankaŭ al la Tabelo de enhavo sur paĝo 179 (233).

La etno-nomoj estas kolektivaj propraj nomoj aŭ »apelativoj«, laŭ la termino sub kiu mi priskribis ali­loke tiun nom-klason: kiel tiaj ili ricevu majusklon konforme al la Fundamento.

Plie estas pli bone kaj ofte pli klare, kiel montris Waringhien (PIV) kaj kiel sugestas la Tabelo de en­havo de la Fundamento mem, ke la rekte derivataj adjektivoj konservu tiun majuskligon.

Ekz-e la Angla, la Franca: cetere neniu povas nei, ke lingvo-nomoj estas veraj propraj nomoj, eĉ se ni plej ofte disponas nur pri adjektivoj por ilin nomi: tamen estas kelkaj ŝatindaj substantivoj, kiel Es­per­anto, Sanskrito, Latino, por citi nur la plej konatojn.

D-ro André Albault


§ 39 – Majuskla skribo

Rim. I. Mi konfesas, ke, kun paso de la tempo, mi fariĝis pli favora al la majuskligo de la popolnomoj, kaj al tiu de la derivataj adjektivoj de la propraj nomoj. Nekontesteble, tio evitigas dubojn, kiam temas pri ne tre konataj nomoj, aŭ ĉe nomoj homonimaj al komunuzaj radikoj: oni tiel pli facile identigas Ĉinuko, Huno, Kazaĥo, Lakono, Seminolo kiel proprajn nomojn kaj ne riskas konfuzi Ligo kun ligo, Medo kun medo, Partoj kun partoj, Tirano kun tirano ktp. (G. W.)

Rim. II. La majusklo restas ĉe la senpere derivataj adjektivoj kaj adverboj: la Pariza grupo(Z); vian Herostratan laboradon(Z), tiel ebliganta distingon de priama letero disde Priama petego, kuba radiko disde Kuba ĉapelo, senegala amatino disde Senegala virino, kanaria kanto disde Kanaria korespondanto, malta faruno disde Malta vino, kreta klifo disde Kreta promontoro, Romana politiko disde romana intrigi ktp. […]

Rim. III. »Esperanto« estis origine personnomo (D-ro Esperanto), kaj tial ĝi konservis la majusklon en sia substantiva formo kaj en la finaĵaj derivaĵoj: libro tradukita en Esp-o; Esperante paroli; Esperanta traduko. […]


Se mi do ĝuste komprenas D-ron André Albault kaj s-anon Gaston Waringhien, la juna instruisto skribu laŭ-fundamente: Angolanoj, Burundanoj, Germanoj, Konganoj, Ruandanoj, Ugandanoj, Zambianoj!

Unu komento

  1. Kara mia! Veredirante, tiaj eraroj estas ĝenerala. Fakte, Esperanto estas vivanta lingvo kaj ĉiu et ni lernas ĉiutage esperante en la venontaj tempoj la plibona skrib/parola metodo. Mi persone ŝatis vian konstrueblan kritikon.

    Ŝato

Respondi

Entajpu viajn informojn sube aŭ alklaku piktogramon por ensaluti:

WordPress.com Logo

Vi komentas per via konto de WordPress.com. Elsaluti /  Ŝanĝi )

Google photo

Vi komentas per via konto de Google. Elsaluti /  Ŝanĝi )

Twitter picture

Vi komentas per via konto de Twitter. Elsaluti /  Ŝanĝi )

Facebook photo

Vi komentas per via konto de Facebook. Elsaluti /  Ŝanĝi )

Connecting to %s